ਨਵੀਂ ਦਿੱਲੀ, 27 ਜੂਨ 2026 : ਫੀਫਾ ਵਰਲਡ ਕੱਪ-2026 (FIFA World Cup-2026) ਵਿਚ ਕੇਪ ਵਰਡੇ ਟੀਮ ਨੇ ਸਾਊਦੀ ਅਰਬ ਦੇ ਨਾਲ ਇੱਕ ਹੋਰ ਗੋਲ-ਰਹਿਤ (0-0) ਡਰਾਅ ਖੇਡਦੇ ਹੋਏ ਨਾਕਆਊਟ ਦੌਰ ਵਿੱਚ ਜਗ੍ਹਾ ਬਣਾਈ ਹੈ ।
ਕੇਪ ਵਰਡੇ ਟੀਮ ਛਾਈ ਹੋਈ ਹੈ ਫੀਫਾ ਕੱਪ 2026 ਵਿਚ
ਆਪਣੇ ਦਮਦਾਰ ਖੇਡ ਨਾਲ ਸਪੇਨ ਵਰਗੀ ਟੀਮ ਨੂੰ ਡਰਾਅ `ਤੇ ਰੋਕਣ ਵਾਲੀ ਕੇਪ ਵਰਡੇ (Cape Verde) ਫੀਫਾ ਵਰਲਡ ਕੱਪ-2026 ਵਿੱਚ ਲਗਾਤਾਰ ਛਾਈ ਹੋਈ ਹੈ । ਇਸ ਟੀਮ ਨੇ ਸ਼ਨੀਵਾਰ ਨੂੰ ਸਾਊਦੀ ਅਰਬ ਦੇ ਨਾਲ ਇੱਕ ਹੋਰ ਗੋਲ-ਰਹਿਤ (0-0) ਡਰਾਅ ਖੇਡਦੇ ਹੋਏ ਨਾਕਆਊਟ ਦੌਰ ਵਿੱਚ ਜਗ੍ਹਾ ਬਣਾਈ ਹੈ। ਉੱਥੇ ਹੀ, ਸਪੇਨ ਹੱਥੋਂ ਹਾਰ ਦਾ ਸਾਹਮਣਾ ਕਰਨ ਵਾਲੀ ਉਰੂਗਵੇ ਦਾ ਸਫ਼ਰ ਖ਼ਤਮ ਹੋ ਗਿਆ ਹੈ ।
ਗੋਲਕੀਪਰ ਵੋਜਿਨਹਾ ਦਾ ਰਿਹਾ ਹੈ ਕੇਪ ਵਰਡੇ ਨੂੰ ਇਥੇ ਤੱਕ ਪਹੁੰਚਾਉਣ ਦਾ ਅਹਿਮ ਰੋਲ
ਕੇਪ ਵਰਡੇ ਨੂੰ ਇੱਥੋਂ ਤੱਕ ਪਹੁੰਚਾਉਣ ਵਿੱਚ ਉਸ ਦੇ ਗੋਲਕੀਪਰ ਵੋਜਿਨਹਾ (Goalkeeper Wojinha) ਦਾ ਅਹਿਮ ਰੋਲ ਰਿਹਾ ਹੈ । ਸਪੇਨ ਖਿ਼ਲਾਫ਼ ਵੀ ਉਨ੍ਹਾਂ ਦੀ ਦਮਦਾਰ ਗੋਲਕੀਪਿੰਗ ਨੇ ਟੀਮ ਨੂੰ ਹਾਰ ਤੋਂ ਬਚਾਇਆ ਸੀ ਅਤੇ ਸਾਊਦੀ ਅਰਬ ਖ਼ਿਲਾਫ਼ ਵੀ ਉਨ੍ਹਾਂ ਦੇ ਸ਼ਾਨਦਾਰ ਖੇਡ ਨੇ ਟੀਮ ਨੂੰ ਨਾਕਆਊਟ ਦੌਰ ਵਿੱਚ ਜਾਣ ਵਿੱਚ ਮਦਦ ਕੀਤੀ । ਇਸ ਦੇ ਨਾਲ ਹੀ ਕੇਪ ਵਰਡੇ ਵਰਲਡ ਕੱਪ ਦੇ ਨਾਕਆਊਟ ਵਿੱਚ ਪਹੁੰਚਣ ਵਾਲਾ ਸਭ ਤੋਂ ਛੋਟਾ ਦੇਸ਼ ਬਣ ਗਿਆ ਹੈ ।
ਗਰੁੱਪ ਐਚ ਵਿਚ ਕੇਪ ਵਰਡੇ ਨੇ ਕੀਤੀ ਹੈ `ਰਾਊਂਡ ਆਫ਼ 32` ਦੀ ਟਿਕਟ ਪੱਕੀ ਕੀਤੀ ਹੈ
ਪਹਿਲੀ ਵਾਰ ਵਰਲਡ ਕੱਪ ਖੇਡ ਰਹੀ ਕੇਪ ਵਰਡੇ ਦੀ ਟੀਮ ਨੇ ਗਰੁੱਪ-ਐੱਚ ਵਿੱਚ ਤਿੰਨ ਅੰਕਾਂ ਦੇ ਨਾਲ ਦੂਜੇ ਸਥਾਨ `ਤੇ ਰਹਿੰਦੇ ਹੋਏ `ਰਾਊਂਡ ਆਫ਼ 32` ਦੀ ਟਿਕਟ ਪੱਕੀ ਕੀਤੀ ਹੈ। ਅਜੇ ਤੱਕ ਇਹ ਟੀਮ ਇਸ ਵਰਲਡ ਕੱਪ ਵਿੱਚ ਇੱਕ ਵੀ ਮੈਚ ਨਹੀਂ ਹਾਰੀ ਹੈ । ਉਸ ਦੇ ਸਾਰੇ ਮੈਚ ਡਰਾਅ ਰਹੇ ਹਨ। ਅਗਲੇ ਦੌਰ ਵਿੱਚ ਉਸ ਦਾ ਸਾਹਮਣਾ ਅਰਜਨਟੀਨਾ ਨਾਲ ਹੋਣਾ ਹੈ । ਆਪਣੇ ਆਖਰੀ ਲੀਗ ਮੈਚ ਵਿੱਚ ਉਤਰ ਰਹੀ ਇਹ ਟੀਮ ਜਾਣਦੀ ਸੀ ਕਿ ਜੇਕਰ ਉਹ ਡਰਾਅ ਹਾਸਲ ਕਰਨ ਵਿੱਚ ਵੀ ਸਫ਼ਲ ਰਹੀ ਤਾਂ ਉਸ ਦਾ ਅਗਲੇ ਦੌਰ ਵਿੱਚ ਜਾਣਾ ਪੱਕਾ ਹੈ । ਹਿਊਸਟਨ ਵਿੱਚ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਟੀਮ ਨੇ ਆਪਣੀ ਅਨੁਸ਼ਾਸਿਤ ਖੇਡ ਦਿਖਾਈ ।
ਕੇਪ ਵਰਡੇ ਦੀ ਖੇਡ ਅੱਗੇ ਸਾਊਦੀ ਅਰਬ ਦੇ ਸਾਰੇ ਦਾਅ ਪੇਚ ਹੋਏ ਫੇਲ
ਸਾਊਦੀ ਅਰਬ (Saudi Arabia) ਨੂੰ ਅਗਲੇ ਦੌਰ ਵਿੱਚ ਜਾਣ ਲਈ ਇਸ ਮੈਚ ਵਿੱਚ ਹਰ ਹਾਲ ਵਿੱਚ ਜਿੱਤ ਦੀ ਲੋੜ ਸੀ ਪਰ ਕੇਪ ਵਰਡੇ ਦੀ ਖੇਡ ਅੱਗੇ ਉਸ ਦੇ ਸਾਰੇ ਦਾਅ ਪੇਚ ਫੇਲ੍ਹ ਹੋ ਗਏ । ਹਾਲਾਂਕਿ ਕੇਪ ਵਰਡੇ ਇਸ ਮੈਚ ਵਿੱਚ ਜਿ਼ਆਦਾ ਖ਼ਤਰਨਾਕ ਟੀਮ ਨਜ਼ਰ ਆਈ ਪਰ ਗੋਲ ਉਸ ਦੇ ਹਿੱਸੇ ਵੀ ਨਹੀਂ ਆ ਸਕਿਆ । ਇਸ ਡਰਾਅ ਤੋਂ ਬਾਅਦ ਕੇਪ ਵਰਡੇ ਦੀ ਟੀਮ ਦੀ ਖੁਸ਼ੀ ਦੀ ਕੋਈ ਸੀਮਾ ਨਹੀਂ ਰਹੀ ਅਤੇ ਪੂਰੇ ਮੈਦਾਨ `ਤੇ ਖਿਡਾਰੀਆਂ ਦੀ ਖੁਸ਼ੀ ਸਾਫ਼ ਦੇਖੀ ਜਾ ਸਕਦੀ ਸੀ । ਮੈਚ ਤੋਂ ਬਾਅਦ ਖਿਡਾਰੀ ਅਤੇ ਸਟਾਫ਼ ਮੋਬਾਈਲ ਫ਼ੋਨਾਂ ਵਿੱਚ ਆਪਣੀ ਖੁਸ਼ੀ ਦੇ ਇਨ੍ਹਾਂ ਪਲਾਂ ਨੂੰ ਕੈਦ ਕਰਦੇ ਹੋਏ ਨਜ਼ਰ ਆਏ ।
